Bumms büst in’n Feernsehn 

Photo by Sam McGhee on Unsplash

Feernsehn kieken is jo egentlich so ganz kommodig. Dor setzt du di gegenöver von den Feernsehapporoot hin, drückst de Feernbedenen un swupst, hest du en Bild un dor snackt den ok noch ener oder du hörst Musik. Fröher müss man noch to’n An- un Ümschalten opstohn un an enen Knoop dreihen. Dat bruukst du vondoog nich mihr 

Over wi mookt man Feernsehn? Wi kummt so en Bericht tostann Dor heff ik so en poor Beleevnisse.

Dat ierste Mol würr dat Tofall. Wi harrn för unsen Sportvereen Beseukerkorten för de Sportsendung von den NDR an’n Oostersünndag­ovend kregen. Na goot. Wi führn dor mit tein Lüüd hin. Weil de Sendung ierst ovends Klock elven anfüng, harrn wi uns so’n lütt beten warm mookt. Wi würrn over rechttiedig dor. De NDR-Sportchef Peter Jensen verkloor uns, dat von siene Gäste ener afseggt harr un wi nich as Interviewpartner inspringen kunnen. Miteens seet ik as Vörsitter mit mienen Stellvertreter blangen den HSV-Meistertrainer Branco Zebec för de Kamera un uns Faustballsport keum nachts Klock elven in de Stuven von vele Lüüd. 25 Minuten hett Jensen uns utquetsch wi en, de de Koh dat affroogt.

En annermool harrn se enen Kunnen von miene Spoorkass in Sponien de Scheckkoort klaut un flietig wat von sien Konto afhoven. Dor reup RTL ut Hamborg bi mi an un wull dat nipp un nau weten, wat dor nu mit possieren dä. De Reporter keum bi mi vörbi un ik heff em den allens verkloort, wi de Kunn versekert wöör un dat he kenen Schoden dorvon harr. Nu müss dat jo noch feernsehgerecht filmt warrn. Dorto güngen wi no buten. Setten uns in en Strotencafe un denn güng de Filmeree un de Tonopnohm jo los. Toierst as Proov. Dat klapp best. Nu de Lifeopnohm. Dor verhaspel ik mi glieks un dach an den Loriot Sketch „Der Lottogewinner“. An’n annern Dag kunn ik mi dat in’n Feernsehn ankieken. Würr allens goot, bit op dat ik nu „Hans Mügge“ heten dä.

En annermol würr dat Feernsehen dorbi, as wi de „Niedersächsische Milchstraße“ bi mi in’n Dörp inweihen deen. Dat würr en groten Oploop mit Minister, Spoorkassendirektor, Buernverband un ik as Börgermeester. Jedeenen hebbt se befroogt (interviewt) un denn würr dat an’n annern Dag in’n ­Regionoolfeernsehn wiest. Veerteihn Doog loter harr ik deenstlich wat in Stuttgart to dohn. Op den Trüchweg kiehren wi in Heilbronn an. Bi den Rundgang keumen wi an en Geschäft vorbi, wo ik Schoh sehn dä, de mi gefallen deen. De Verköpersch pass mi de Schoh an, keek mi an, un sä: „Ich habe Sie gestern im Fernsehen gesehen. Sie kommen doch aus Norddeutschland. Da war etwas mit Milch.“ Süh nu würr ik ok al bi de Schwoben.

Bi unsen Sportvereen steiht Faustball ganz boben an. Dor sünd de Froonslüüd lange Johrn Spitze in Europa ween. So güng dat ok enmool bi uns in’n Dörp üm den Europokol gegen Österriek un de Schweiz. Hauptangriffsspelerin würr en von uns Döchter. Dat Feernsehen würr den ganzen Dag dorbi. Se snacken mit dissen un mit den. Filmen den ganzen Dag. An End wullen se noch en Interview von mi as Vadder un Börgermeester in mien Amtszimmer hebben. Uns Dochter, de Motoorrad führn dä, müss op en Motoorrad sitten un dörch de Gegend karjolen. In Fernsehen keum dat over ganz goot röver. Over dat würr doch so’n lütt beten manipuliert.

En scheunet Beleevnis harr ik annerletzt. Dat Land Neddersassen wöör 75 Johr oolt worrn un se harrn to de NDR-Talkshow den Ministerpräsidenten un siene Vörganger inloodt. Mit dorbi würr ok David McAllister, de nu in’t Europa-Parlament sitten deiht. As he nu an de Reeg würr, frögen se em, wi he dat mit de plattdüütsche Sprook holen dä. Dor anter he life in disse Feernsehsendung, dat sien Lieblingsspröök: „Snacken is goot, wat dohn is beter“ würr. Dissen Spröök harr he mol, as he noch Ministerpräsident von Neddersassen würr, von mi as Börgermeester ut Düünbeudel schinkt kregen. Un disse Spröök hingt vondoog noch in sien Europa-Büro in Brüssel. 

Doröver heff ik mi doch bannig freit. 

Sowat nöömt man ok Nachhaltigkeit.