© Bild von Carlos Insignares auf Pixabay
Nich veel snacken, Kopp in’n Nacken, so segg de Volksmund dat foken, wenn dat üm dat korthannige Drinken geiht.
So hollt mien Fro dat ok. Se gifft korte Kummandos un denn hett sik dat.
Meisttiets bün ik oder ok anner Lüüd denn ok willig un wi doot dat denn ok.
Bi so’n Danzvergnögen kunn ehr dat mehrstendeels nich lang noog duern. Over eenmol, ik glööv, dat würr bi de Fohnenweihe von den Schützenvereen, dor wull se no Huss un se segg kort un bünnig to de Muskanten: „Ik heff keen Lust mihr. Ji künnt ophüern. Pakt jaun Instrumenten man in un mookt
Fierovend.“
De Musikers freien sik un hürrn op. Over de Schützenpräsident harr dor en annere Meenen von un schimp jüm wat ut.
En annermol, op unsen Jubiläumsball in’n Dörp. To wull ik wegen de velen wichtige Ehrengäst, de an annern Dag keumen, so gegen Klock twölf (24 Uhr) rechtiedig no Huus.
Wat segg mien Fro kort un knapp: „Wenn du no Huus wullt, denn goh no Huus. Ik bün keen Börgermeester. Ik bliev noch hier. Ik bün hier noch nich fertig.“
Wi würrn in dat Johr 50 Johr verheiroot. Sowat harr dat bi uns noch nie nich geven.
Letzt vertellt ik mien Fro von de Akschoon von den Vereen „De Plattdüütschen“, de över föfftig Kinnergoorns mit Ünnerrrichtsmateriol utstaffern wull. Wat ok veel Geld köst. Un wo de Vereen, trotz Spenn von de Kreispoorkass un den Londschoppsverband noch ollig wat togeven müss. Ik wull an annern Dag den Landroot frogen, op he so ne Oort Empfehlungschrieven mit ünnerschrieven dä.
Dor meen mien Fro kort un knapp: „Denn froog em man glieks, op he noch en poor Euros to disse Akschoon tostüern kunn.“
Ik rööp den Landroot Michael Roesberg an annern Dag an. Mit dat ünnerschrieven harr dat keen Not. As ik em denn von denn Vörslag von mien Fro vertell, meen he: „Das ist ein guter Vorschlag von deiner Frau. Teile mir die Kontonummer mit. Ich überweise euch 1.000 €.“
So is dat: Nich veel snacken.
Heinz Mügge
Vörsitter von den Vereen „De Plattdüütschen“