Heinz Mügge
Vörsitter von den Vereen „De Plattdüütschen“
Ik bün keen groten Kortenspeler un von de Glücksspeelautomoten hol ik gor nix.
Un ok nich BINGO-LOTTO. – Dat is mi to langwielig.
Over Lotto. Jo, dat mook ik siet Johren mit.
Jümmer twee Kasten mit süss Tohlen un denn mit all den Schickimicki.
Ik mook dat jümmer för acht Weken in ’n vörut. – Middeweken- un Sünnovends-Lotto.
Denn Schien legg ik jümmer in de Komood. Over nokieken do ik meisttiets nich.
Ik mark mi dat Dotum. Wenn de acht Weken rüm sünd, denn warrt dat Lotto-Speel wedder för acht Weken verlängert.
Over vörher kummt noch en ganz wichtiget Rituol:
„De Lotto-Fro kickt no, ob ik wat gewunnen heff!
För jeden Speeldag ingelt.
Meist sünd dat den 5,- €. Oder en Gewinn ut de 6. Klass mit 12,60 € oder so.
Nu würr dat wedder so wiet. De acht Weken würrn rüm.
Ik also mit den olen Lotto-Schien hin no de Lotto-Fro.
Denn steek se in ehren Computer. In denn Momang fangt de an to klingeln.
De Lotto-Fro weet over nich wat dat to bedüden hett.
Se röppt no de Cheffin. – De Cheffin röppt dörch den Loden:
„Wenn der Computer klingelt, dann ist da ein Gewinn von über 500 € drauf.“
So, nu weet all de Lüüd in ’n Loden Bescheed.
Ik segg to de Lotto-Fro: „Woveel mag dat denn woll ween?
Se segg: „Das können tausend € oder auch ’ne Million sein. Das zeigt mir der Computer leider nicht an.“
Ik dink: „Milljon – bün ik nu Milljonär?“
Ik krieg al ganz feuchte Hannen un segg to de Fro:
„Denn Lottoschien, denn Schien, kann ik denn woll wedder hebben?“
Se kickt mi ganz abasig an, as wenn se seggen will: „Nu dreih man nich dörch.“
Se giff mi denn Schien trüch un dorto noch enen Vördruck mit den ik den Lotto-Schien mit Angoov von mien Konto-Nummer an de Lotto-Gesellschop no Hannober schicken schall. Dat mook ik denn ok fuurts.
Wi harrn to de Tiet en Reis no Ingland, Cornwell, bookt. De güng an ’n annern Dag morgens Klock fief los. Also keen Tiet notofrogen, wo hoch de Gewinn würr.
Wenn mien Fro un ik nachts in ’n Bett legen, denn dachen wi jümmer an den Lotto-Gewinn. Jeden Ovend de sülbige Opregung: „Milljonär oder keen Milljonär.“
Un du kannst keeneen frogen: „Woveel möcht dat ween?“
Dusend €, teihndusend €, gor nich uttodinken villicht ’ne Milljon?
Wat mookst du mit dat ganze Geld? De Kinner wat schinken? Een Huus buen?
En ne’et Auto keupen? Den Sportvereen oder Rietvereen wat schinken?
Na, no teihn Doog würrn wi ovends gegen Klock negen wedder in ’n Huus.
To düch mien Fro, führ doch noch mol eben no de Sporkass un hol den Konto-Uttog. Ik müch doch to giern weten, wat de Lotto-Gesellschop överwiest hett.
Ik sett mi denn fuurts op mien Fohrrad un denn hin no de Sporkass. Un wat harr de Lotto-Gesellschop överwiest? Keen Milljon over 837 €. Dat is doch ok al scheun wat!
Over de Gedanken keumen doch jümmer wedder, ’ne Milljon, man wat mookst du dormit?
Image by Hermann Traub from Pixabay